IMEI tekshirish: kodni telefonda bilish va UZIMEI ro'yxati

IMEI kodni shu yerda tekshiring

Vositani telefon ekrani uchun yig'dik: kodni kiritishingiz bilan nazorat raqami hisoblanadi va qurilma modeli aniqlanadi. Internet tezligi past bo'lsa ham ishlaydi, chunki hisob-kitob brauzerning o'zida bajariladi.

IMEIcheck

15 raqamli IMEI kodni kiriting

0 / 15

Kodni kiriting yoki *#06# ni tering

uzimei.uz ni ochish

Ikki SIM-kartali telefonda ikkita IMEI bo'ladi — ikkalasini ham alohida tekshiring va ro'yxatdan o'tkazing.
Nazorat summasi brauzerda hisoblanadi. Bizning serverga faqat birinchi 8 raqam (model kodi) yuboriladi. To'liq kod brauzeringizdan to'g'ridan-to'g'ri UZIMEI rasmiy reyestriga ketadi — uzimei.uz da qo'lda kiritganingiz bilan bir xil so'rov. Reyestr bir IP uchun kuniga 10 ta tekshiruv beradi.

IMEI kodni telefondan qanday bilish mumkin

IMEI kod SIM-kartaga emas, qurilmaning o'ziga biriktirilgan, shuning uchun SIM-kartani almashtirish kodni o'zgartirmaydi. Uni topishning bir nechta yo'li bor.

Terish oynasi. *#06# ni tering — kod darhol ekranda chiqadi. Ikki SIM-kartali qurilmada ikkita kod ko'rsatiladi.
Android sozlamalari. Sozlamalar → Telefon haqida → Holat yoki IMEI ma'lumoti.
iPhone. Sozlamalar → Asosiy → Haqida, ro'yxatni pastga aylantiring.
Qurilma qutisi. Yon tomonidagi shtrix-kodli yorliqda IMEI yozilgan. Qutini saqlab qo'ying — qurilma yo'qolganda shu yorliq asosiy dalil bo'ladi.
Kafolat taloni va chek. Rasmiy sotuvchilar kodni talonga yozib beradi.
Korpus ostida. Eski modellarda stiker batareya ostida, yangilarida SIM lotogida yoki orqa qopqoqda bo'ladi.

Kodni qo'lda ko'chirayotganda xato qilish oson: 15 raqam ichida bitta raqamni adashtirish yetarli. Shuning uchun kodni yuqoridagi vositaga kiriting — nazorat raqami mos kelmasa, vosita buni darhol aytadi.

IMEI ro'yxatdan o'tkazish tartibi

O'zbekistonda mobil qurilmaning IMEI kodi davlat reestrida ro'yxatdan o'tishi kerak. Ro'yxatdan o'tmagan qurilma SIM-karta ulangandan ma'lum muddat o'tgach tarmoqdan uziladi. Tizimni Raqamli texnologiyalar vazirligi tasarrufidagi «O'zbekiston telekommunikatsiya tarmoqlarini boshqarish Respublika markazi» DUK yuritadi.

Kimga ro'yxat kerak

Chet eldan olib kelingan yoki pochta orqali kelgan qurilma egalariga.
Rasmiy bo'lmagan nuqtadan sotib olingan telefon egalariga.
Import qiluvchilar va mahalliy ishlab chiqaruvchilarga.

Rasmiy do'kondan olingan qurilma odatda sotuvchi tomonidan allaqachon ro'yxatga olingan bo'ladi — buni avval tekshirib ko'ring, ortiqcha ariza berishning hojati yo'q.

Hujjatlar

Rezidentlar: biometrik pasport (seriyasi ikki harf va yetti raqam), JSHSHIR ning 14 raqami, o'z nomiga rasmiylashtirilgan mahalliy operator SIM-kartasi.
Norezidentlar: xuddi shu pasportga norezident maqomi bilan rasmiylashtirilgan SIM-karta.
Fuqaroligi bo'lmagan shaxslar: biometrik yo'l hujjati.
Pochta orqali kelgan qurilma: muhrlangan qoplama talab qilinadi.

SIM-karta aynan arizachining nomida bo'lishi shart. Bu talab begona shaxslarning shaxsga doir ma'lumotlaridan foydalanib ro'yxatdan o'tishni to'xtatish uchun kiritilgan: 2019-yil 2-iyuldagi 547-sonli «Shaxsga doir ma'lumotlar to'g'risida»gi qonunning 33-moddasi, javobgarlik esa Ma'muriy javobgarlik to'g'risidagi kodeksning 46-2 va Jinoyat kodeksining 141-2 moddalarida.

Qadamlar

IMEI kodni *#06# orqali oling va tekshiring.
uzimei.uz da qurilma allaqachon ro'yxatda emasligiga ishonch hosil qiling.
Yuqoridagi olti usuldan birini tanlab ariza topshiring.
SMS orqali kelgan ariza raqamini saqlang.
Ariza raqami bo'yicha to'lovni amalga oshiring.
Tasdiq SMS kelguncha kuting. Holatni USSD yoki sayt orqali kuzatish mumkin.

Qurilmada bir nechta IMEI bo'lsa, ularning barchasini bitta arizada ko'rsating.

IMEI ro'yxatdan o'tkazish narxi

Narx so'mda qat'iy belgilanmagan — u bazaviy hisoblash miqdoridan (BHM) foizda olinadi, shuning uchun BHM o'zgarganda summa ham o'zgaradi. 2025-yil 1-avgustdan amal qiladigan tariflar:

Kim	Shart	Narx
Jismoniy shaxs (rezident va norezident)	SIM-karta ulangan vaqtdan 30 kalendar kun ichida	BHM ning 20%
Jismoniy shaxs (rezident va norezident)	30 kalendar kundan keyin	BHM ning 25%
Import qiluvchi	—	BHM ning 20%
Mahalliy ishlab chiqaruvchi	—	BHM ning 10%
Norezident	Chet el SIM-kartasi, rouming	Bepul

To'lov qurilma uchun emas, ariza raqami uchun qilinadi — raqam ariza topshirilgach SMS orqali keladi. Qabul qiluvchilar: Payme, Click, Humans, Paynet va banklar. Joriy summani rasmiy tariflar sahifasida ko'rish mumkin.

Shu sababli kechiktirmaslik foydali: 30 kun ichida murojaat qilish 25 foiz o'rniga 20 foiz to'lash imkonini beradi.

Telefon bloklangan bo'lsa nima qilish kerak

Qurilma tarmoqni ko'rmay qolsa va qo'ng'iroqlar o'tmasa, sabab ko'pincha IMEI ro'yxatdan o'tmaganida bo'ladi. Shoshilmasdan tartib bilan tekshiring.

Kodni qayta oling. *#06# ni tering va vositaga kiriting. Nazorat raqami xato bo'lsa — avvalgi arizada kod noto'g'ri yozilgan.
Model mos kelishini solishtiring. Vosita ko'rsatgan brend va model qo'lingizdagi telefonga to'g'ri kelmasa, kod boshqa qurilmaniki.
Rasmiy holatni ko'ring. uzimei.uz da kodni kiriting — javob reestrdan keladi.
Ikkinchi IMEI ni unutmang. Ikki SIM-kartali qurilmada bitta kod ro'yxatdan o'tib, ikkinchisi o'tmagan bo'lishi mumkin. Shunda bitta SIM ishlaydi, ikkinchisi yo'q.
Ariza bering va to'lang. Qurilma haqiqatan ro'yxatda bo'lmasa, ariza topshiring va ariza raqami bo'yicha to'lovni amalga oshiring.
Qo'llab-quvvatlashga murojaat qiling. 1170 raqami kuniga 24 soat ishlaydi. Rasmiy e'lonlar Telegram kanalida chiqadi.

Agar telefon o'g'irlangan bo'lsa, tartib boshqacha: IMEI ni bloklash uchun ichki ishlar organlariga ariza bering. IMEI bo'yicha qurilmaning joylashuvini onlayn aniqlab beradigan ommaviy xizmat mavjud emas — shunday va'da beradigan saytlar ishonchsiz.

Bojxona orderi va chet eldan kelgan qurilma

Chet eldan olib kelingan qurilma bojxonada rasmiylashtirilgan bo'lsa, kirim orderi holatini alohida tizimdan ko'rish mumkin: imei.customs.uz. Bu UZIMEI dan ayri xizmat, shuning uchun ro'yxat holatini u yerdan izlamang.

Pochta orqali kelgan qurilmani ro'yxatdan o'tkazishda muhrlangan qoplama talab qilinadi — posilkani pochta bo'limida ochmasdan oling.

Ko'p beriladigan savollar

IMEI kod nima?

IMEI (International Mobile Equipment Identity) — mobil qurilmaning 15 raqamli xalqaro raqami. U SIM-kartaga emas, aynan apparatning o'ziga biriktirilgan. Dastlabki 8 raqam — TAC, ya'ni ishlab chiqaruvchi va model kodi; keyingi 6 raqam — seriya raqami; oxirgi raqam — nazorat raqami.

IMEI kodni qanday bilsam bo'ladi?

Eng tez usul — terish oynasida *#06# kombinatsiyasini terish, kod darhol ekranda chiqadi. Bundan tashqari kod qurilma qutisidagi yorliqda, kafolat talonida, ba'zi modellarda SIM lotogida yoki batareya ostidagi stikerda yozilgan bo'ladi.

Nega telefonimda ikkita IMEI chiqdi?

Ikki SIM-kartali qurilmalarda har bir radiomodul uchun alohida IMEI beriladi. UZIMEI tizimida ularning barchasini ro'yxatdan o'tkazish kerak, aks holda ikkinchi SIM ishlamay qolishi mumkin.

Bu sahifadagi vosita ro'yxatdan o'tganini ko'rsatadimi?

Yo'q. Ro'yxat holati davlat reestrida saqlanadi va uni faqat rasmiy uzimei.uz tizimi beradi. Bu yerdagi vosita kodning o'zini tekshiradi: nazorat raqami matematik jihatdan to'g'rimi va kod qaysi brend hamda modelga tegishli. Shu ikki tekshiruv xatolarning aksariyatini darhol topadi.

Nazorat raqami nima uchun kerak?

Oxirgi raqam Luhn algoritmi bo'yicha qolgan 14 raqamdan hisoblanadi. Agar kodni ko'chirishda bitta raqam xato yozilsa yoki ikkita raqam o'rin almashsa, nazorat raqami to'g'ri kelmaydi. Shuning uchun ariza berishdan oldin kodni shu yerda tekshirish arizani rad etilishidan saqlaydi.

IMEI ro'yxatdan o'tkazish qancha turadi?

2025-yil 1-avgustdan jismoniy shaxslar uchun narx bazaviy hisoblash miqdoridan (BHM) olinadi: SIM-karta ulangan vaqtdan boshlab 30 kalendar kun ichida murojaat qilinsa — BHM ning 20 foizi, 30 kundan keyin — 25 foizi. Import qiluvchilar uchun 20 foiz, mahalliy ishlab chiqaruvchilar uchun 10 foiz. Chet el SIM-kartasidan roumingda foydalanayotgan norezidentlar uchun — bepul.

Ro'yxatdan o'tkazish uchun qanday hujjatlar kerak?

Rezidentlardan biometrik pasport (seriyasi ikki harf va yetti raqamdan iborat), JSHSHIR ning 14 raqami hamda o'z nomiga rasmiylashtirilgan mahalliy operator SIM-kartasi talab qilinadi. Norezidentlar uchun — xuddi shu pasportga norezident maqomi bilan rasmiylashtirilgan SIM-karta.

Nega SIM-karta aynan mening nomimda bo'lishi kerak?

Bu talab begona shaxslarning shaxsga doir ma'lumotlaridan foydalanib ro'yxatdan o'tishning oldini olish uchun kiritilgan. Asosi — 2019-yil 2-iyuldagi 547-sonli «Shaxsga doir ma'lumotlar to'g'risida»gi qonunning 33-moddasi; javobgarlik Ma'muriy javobgarlik to'g'risidagi kodeksning 46-2 va Jinoyat kodeksining 141-2 moddalarida belgilangan.

Telefon ro'yxatdan o'tmagani uchun bloklangan bo'lsa nima qilish kerak?

Avval kodni shu sahifada tekshiring — ko'pincha muammo kodning noto'g'ri ko'chirilganida bo'ladi. Keyin uzimei.uz da holatni aniqlang. Agar qurilma haqiqatan ro'yxatda bo'lmasa, ariza bering va to'lovni amalga oshiring; tizim arizani ko'rib chiqqach, qurilma tarmoqqa qaytadi. Aniqlik kiritish uchun 1170 raqamiga qo'ng'iroq qiling, xizmat kuniga 24 soat ishlaydi.

IMEI ro'yxatdan o'tkazishni qayerdan boshlayman?

Olti yo'l bor: BIRDA ilovasi, *1170# USSD so'rovi, SMS, MyGov ilovasi, UZIMEI operatorlarining ofislari va pochta aloqasi bo'limlari. Pochta orqali kelgan qurilma uchun muhrlangan qoplama talab qilinadi.

Bojxona kirim orderi holatini qayerdan tekshiraman?

Buning uchun alohida tizim bor — imei.customs.uz. Chet eldan olib kelingan qurilma bojxonada rasmiylashtirilgan bo'lsa, order holatini o'sha yerdan ko'rish mumkin.

Kiritgan IMEI kodim saqlanadimi?

Yo'q. Nazorat raqami brauzeringizning o'zida hisoblanadi. Brend va modelni aniqlash uchun serverga faqat kodning birinchi 8 raqami — TAC yuboriladi; u model kodi bo'lib, aniq qurilmani yoki egasini ko'rsatmaydi. To'liq 15 raqamli kod sahifadan chiqmaydi.

Jismoniy shaxs, SIM ulangandan 30 kun ichida	88 000 so'm20% BHM · ≈ 7,4 $
Jismoniy shaxs, 30 kundan keyin	110 000 so'm25% BHM · ≈ 9,3 $
Import qiluvchi	88 000 so'm20% BHM · ≈ 7,4 $
Mahalliy ishlab chiqaruvchi	44 000 so'm10% BHM · ≈ 3,7 $
Norezident, chet el SIM (rouming)	bepul

IMEI tekshirish: kodni bilish, nazorat qilish va UZIMEI ro'yxatidan o'tkazish